أول 24 ساعة في الهند | نمت في أغرب هوستل بـ 15 دولار! 🇮🇳
بداية رحلة جديدة ومغامرة مجنونة في قارة تانية! أخيراً وصلت الهند لأول مرة، وتحديداً مدينة مومباي. الرحلة دي قررت إنها تكون عفوية وبدون تخطيط مسبق عشان أنقلكم التجربة الحقيقية، الانطباع الأول، والصدمة الثقافية من غير أي فلاتر أو تجميل للواقع.
بدأت الرحلة من مطار دبي، رحلة طيران قصيرة حوالي 3 ساعات ونص، بس اللي كان مستنيني هناك عالم تاني خالص. من أول ما نزلت المطار وبدأت أتعامل مع إجراءات الجوازات الورقية، لغاية ما استلمت الشنطة بتاعتي اللي جاتلي متغلفة في بوكس بطريقة ماتوقعتهاش.
أول صدمة حقيقية كانت بره المطار: الزحمة، الفوضى، والحر! درجة الحرارة كانت عالية جداً، واضطريت أتعامل مع أوبر بالكاش لأول مرة من فترة طويلة. ركبنا التاكسي الهندي الصغير وبدأنا نستكشف شوارع مومباي وسواقتهم اللي شبه إنجلترا، واكتشفت إنهم بيعتمدوا جداً على الصناعة المحلية في عربياتهم.
وصلنا لمنطقة "باندرا ويست" (Bandra West)، وهنا كانت الصدمة التانية: الهوستل! حجزت سرير في هوستل للـ Backpackers بـ 15 دولار في الليلة، بس المكان من جوه كان عامل زي العنبر، وقفل الباب حكايته حكاية بالجنزير والشنكل. اتعرفت هناك على ريسبشنست اسمه "أبو الكلام"، شخصية عجيبة بيقرا عربي من غير ما يفهم معناه!
بالليل مقدرتش أقعد، نزلت أستكشف الشارع الهندي، شفت بياعين الخضار، عربيات الأكل، حلة البرياني اللي بـ 80 روبية بس، وجربت لأول مرة "الباني بوري" المشطشط. وكمان هوريكم شكل العملة الهندية وإزاي فكيت 20 دولار بـ 1900 روبية تقريباً. وطبعاً مسك الختام كان الفيران اللي بحجم القطط اللي مسيطرة على الشوارع بالليل!
فيديو مليان تفاصيل ومواقف غريبة، أتمنى يعجبكم وتعيشوا معايا الأجواء كأنكم موجودين بالظبط.
👇 اكتبولي في التعليقات:
إيه أكتر حاجة صدمتكم أو استغربتوها في الفيديو ده؟ وحابين أروح فين وأجرب إيه في الأيام اللي جاية في الهند؟
#طاهرمسافر #الهند #مومباي
#استكشاف #تجارب #سفر
